बुङ्बुङ्ती धुलोभित्र यात्रा
राजधानी काठमाडौँको लाइफलाइन नारायणगढ मुग्लिन सडकखण्डको यात्रा कष्टकर बन्दै गएको दुर्इ वर्ष भयो । दैनिक दुर्इ हजारभन्दा बढी सवारी साधन गुड्ने यो सडकमा अहिले बुङ्बुङ्ती धुलोभित्र निसास्सिएर यात्रा गर्नु पर्छ । सडक किनारमा राखिएका बालुवा, गिटी, सिमेण्टलगायतका निर्माण सामग्री धुलो उत्पादन गर्ने कारखाना बनेका छन् ।निर्माण सामग्री बोकेर सडकमा ओहोरदोहोर गर्ने एक्साभेटर, ब्रेकर, लोडर, ग्रेडर, रोडरोलर र टि्रपरले धुलोको धुनीमा तेल थप्छन् । सवारी चालकदेखि यात्रुसम्म सबैले धुलो र कष्ट सहँदै धुलेबाटोमा यात्रा गर्नुपर्ने बाध्यता छ । यो अवस्था आगामी वर्षसम्म कायमै रहने देखिन्छ ।
नारायणगढदेखि मुग्लिनसम्मको ३६ किलोमिटर सडकमध्ये आँपटारीदेखि मुग्लिनसम्मको ३४ किलोमिटर सडकलार्इ चौडा बनाउने काम सुरु गरेपछि मुग्लिनको बाटोमा यात्रा कष्टकर बन्दै गएको हो ।नारायण्ागढहुँदै काठमाडौँ र पोखरा जाने वा त्यताबाट नारायणगढ आउने सबैजसो यात्रुले दिनहुँ सास्ती खेप्नु परिरहेको छ । दिउँसो साढे चार घण्टासम्म यातायात अवरुद्ध हुने हुँदा अहिले धेरैजसोले रात्रिबसमा यात्रा गर्न थालेका छन् । अत्यावश्यक काम पर्नेहरुले हवार्इ सेवा रोज्न थालेका छन् । मुग्लिनको बाटोकै कारण भरतपुर विमानस्थलमा यात्रुको चाप बढेको छ ।
जिल्ला प्रशासन कार्यालय, ट्राफिक प्रहरीलगायतसँग छलफल गरी कामको समयमा सवारी आवागमन बन्द गरेर पहाड काट्ने, ढुंगा काट्ने र सडक बिस्तार गनर्े काम गरिएको नारायण्ागढ(मुग्लिन सडक आयोजनाले जनाएको छ ।यसवर्ष चैतसम्ममा सडकको काम सिध्याउने सुरुको लक्ष्य भएपनि भूकम्प र नाकाबन्दीले काममा असर पुगेको भन्दै आयोजनाको म्याद २०७४ भदौसम्म पुर्याइएको छ । आगामी वर्ष्ा भदौसम्ममा पनि काम सकिने छाँट छैन । अहिलेसम्म करिब ४० प्रतिशतमात्र काम सम्पन्न भएको छ । द्रुत गतिमा काम भएपनि अब एक वर्ष अर्थात २०७४ चैतसम्ममा सडक बिस्तार र पुनर्निर्माणकाे काम सकिने अनुमान छ ।
धुलाम्मे बाटोमा ट्राफिक व्यवस्थापनका लागि मुग्लिन, जुगेडी र आँपटारीमा प्रहरी खटिएका छन् । सडकमा धुलो मार्न तीन वटा ट्यांकरले पानी छर्किएपनि प्रभावकारी देखिएको छैन । कामदारले बुङ्बुङ्ती उडेको धुलोभित्रै काम गरिरहेका छन् । रामनगरको जंगल नजिक सडक कालोपत्रे गर्नका लागि ग्राभेल ओछ्याएर आधार निर्माण गर्ने काम सुरु भएको छ । विश्व बैंकको दुर्इ अर्ब ९० करोड रुपैयाँ आर्थिक सहयोगमा नारायणगढ मुग्लिन सडक आयोजनाले आँपटारीदेखि मुग्लिनसम्मको ३४ किलोमिटर सडकलार्इ तीन खण्डमा छुट्याएर मर्मत र चौडा पार्ने काम गरिरहेको छ ।
आँपटारीदेखि दासढुंगासम्मको १० दशमलव ४५ किलोमिटर लामो एक नम्बर खण्डमा बीएलए र श्रेष्ठ कन्स्ट्रक्सन्स, दासढुंगादेखि सिमलतालसम्मको १० दशमलव ६९ किलोमिटर लामो दुर्इ नम्बर खण्डमा उडहिल र लामा कन्स्ट्रक्सन्स एवम् सिमलतालदेखि मुग्लिनसम्मको १२ दशमलव ८८ किलोमिटर लामो तीन नम्बर खण्डमा सुपि्रम र रौताहा कन्स्ट्रक्सन्सले ज्वाइन्टभेञ्चरमा काम गरिरहेका छन् ।मुग्लिन सडक मर्मतको काम गतवर्ष वैशाखदेखि सुरु भएपनि भूकम्पले तीन महिना रोकिएर भदौमा केही मात्रामा सुरु भएको थियो ।
शब्द र तस्बिर : सूर्यप्रकाश कँडेल
Comments
Post a Comment